2025 жылғы 27 қарашада Қазақ ұлттық қыздар педагогикалық университетінің Әлеуметтік-гуманитарлық ғылымдар және өнер институтының директоры Бақытжан Сапаров Набережные Челны мемлекеттік педагогикалық университеті ұйымдастырған I халықаралық (XI Бүкілресейлік) «Білім және мәдениеттер диалогы: дәстүрлер мен қазіргі заман» атты ғылыми-тәжірибелік конференцияға қатысты.
Пленарлық отырыста Бақытжан Сапаров «Қазіргі білім берудегі мәдени әртүрлілік пен ұлттық тәрбиені ілгерілету» тақырыбында баяндама жасады. Конференция полимәдени білім беру, этнопедагогика және мәдениетаралық қарым-қатынас саласындағы ресейлік және шетелдік мамандар арасында диалог алаңын құруда маңызды рөл атқарды.
Конференция аясында қатысушылар мәдениетаралық қарым-қатынас мәдениетін дамытуға, азаматтық сананы қалыптастыруға, патриотизмді ілгерілетуге бағытталған ғылыми әзірлемелерді талқылап, жаңа тәсілдерді тәжірибеден өткізу мүмкіндігіне ие болды.
Шараға Ресейдің 15 аймағынан, Қазақстан, Түрікменстан, Алжир және басқа елдерден келген делегаттар қатысты. Пленарлық отырыс, тақырыптық секциялар, көптілділікті дамыту және көшіп-қонушы балаларды оқыту бойынша шеберлік сыныптары, педагогикалық инновациялар көрмесі ұйымдастырылды.
Іс-шара халықаралық ғылыми байланыстарды кеңейтуге, салалық тәжірибе алмасуға және полимәдени білім беруді дамытуға арналған инновациялық шешімдерді енгізуге мүмкіндік жасады.
