Қазақ ұлттық қыздар педагогикалық университетінің Басқарма Төрағасы – Ректор Кәрімова Бейбіткүл Сәрсемханқызы бастаған делегация Қазақстан Республикасы Президентінің жанындағы Қазақстан Республикасының Ұлттық ғылым академиясының құрылғанына 80 жыл толуына арналған салтанатты жиынға қатысты.
Көрнекті ғалым, академик Қаныш Имантайұлы Сәтбаев негізін қалаған Академия отандық ғылымның қалыптасуы мен дамуына зор үлес қосып, іргелі зерттеулер мен ғылыми мектептердің өркендеуіне жол ашты.
Бүгінде Мемлекет басшысы Қасым-Жомарт Кемелұлы Тоқаевтың ғылымды қолдауға бағытталған бастамалары, Ғылым және жоғары білім министрлігі мен Академия басшылығының жүйелі жұмысы еліміздің ғылыми әлеуетін нығайтуға бағытталған.
Университет ректоры өз құттықтауында: «Академияның сексен жылдық тарихы – еліміздегі ғылымның қалыптасуы мен өркендеуінің, іргелі зерттеулердің дамуы мен ғылыми мектептердің орнығуының айқын көрінісі. Академияның бай ғылыми тәжірибесі мен қалыптасқан дәстүрлері жоғары оқу орындарындағы зерттеу жұмыстарының дамуына айрықша ықпал етуде», – деп атап өтті.
Қазақ ұлттық қыздар педагогикалық университеті мен Ұлттық ғылым академиясы арасындағы ғылыми ынтымақтастық зерттеулерді дамытуға, ғалымдар байланысын нығайтуға және жас зерттеушілерді қолдауға мүмкіндік береді.
Салтанатты жиында ректор Бейбіткүл Кәрімова Ұлттық ғылым академиясының 80 жылдық мерейтойлық төсбелгісімен, Басқарма мүшесі – ғылыми жұмыс және стратегиялық бастамалар жөніндегі проректоры Ақтолқын Құлсариева «Қаныш Сәтбаев» төсбелгісімен марапатталды.
Қазақ ұлттық қыздар педагогикалық университеті Ұлттық ғылым академиясының ұжымын, академиктер мен барша ғалымдарды мерейтоймен құттықтайды!
Отандық ғылым өркендеп, жаңа ғылыми жетістіктер ел игілігіне қызмет ете берсін!
