АЛМАТЫ. 4 наурыз. Баспасөз орталығы – Халықаралық әйелдер күніне орай QyzPU-да «Көктем аруы» байқауы ұйымдастырылды. Сұлулар сайысында 14 бойжеткен бақтарын сынады.
Қазақ ұлттық қыздар педагогикалық университетінің АКТ залында Әлеуметтік-гуманитарлық ғылымдар және өнер институты, Кәсіптік білім кафедрасының ұйымдастыруымен 8 - наурыз Халықаралық әйелдер күні мерекесіне арналған «Көктем ару 2022» атты байқау өтті.
Байқаудың негізгі мақсаты қыздарды халқымыздың ізгі қасиеттері: имандылық, инабаттылық, ізеттілік, ісмерлікке және парасатты, жан – жақты білімді болуға, әсемдік, сұлулық әлемін түсінуге тәрбиелеу. Табиғат сыйлаған сұлулық қасиеттерінің ашылуына көмектесу.
Байқауға дайындық барысында бойжеткендер түрлі мәдени бағдарламаларға қатысып, сән агенттіктерінде өз шеберліктерін арттырған. Сондай-ақ қазақ халқының тарихы, салт-дәстүрі бағытындағы тың деректермен танысып, білімдері мен біліктілігін арттыруға арналған арнайы шараларға атсалысты.
Байқау өзін-өзі таныстыру, дарындар байқауы, танымдық деңгейін артыруға арналған бейне сұрақ, ұлттық киімді киіп, сахнада жүру, сахналық көрініс сияқты кезеңдер бойынша ұйымдастырылды.
– Сайыста қыздар өздерін таныстырып, өресінің биіктігін танытуға ұмтылды. Артынша шығармашылық шеберліктерін сынатты. Әркімнің қабілеті әртүрлі. Таңдаған салалары да әр алуан. Десе де шама-шарқынша өз өнерлерін паш етті. Жарыста ой ұшқырлығы сыналып, білім деңгейлері тексерілді. Қыздарға қойылған сауалдарға жан-жақты, дәлірек айтқанда сауатты жауап беру талап етілді. Сәнқойлық сынаққа да өріс ашылды. Бұл кезеңде отандық дизайнерлердің қолынан шыққан сәнді көйлек үлгілері көпшілік назарына ұсынылды. Сыртқы сымбат сыналып, сахнадағы жүріс-тұрысқа да мән берілетін тур осы, – дейді іс-шара ұйымдастырушылары.
Назарларыңызға сайыс нәтижесінде анықталған жеңімпаздар тізімін ұсынамыз:
Бас жүлде – Ақтаубек Інжумаржан Ақтаубекқызы, «Мектепке дейінгі оқыту және тәрбиелеу» мамандығының 1 курс студенті, Педагогика және психология институты;
І орын – Омаржан Сабина Ерболқызы, Әлеуметтік – гуманитарлық ғылымдар және өнер институты, «Мәдени-тынығу жұмысы» мамандығының 1 курс студенті;
ІІ орын – Нүсіпалы Марал Азаматқызы, Әлеуметтік – гуманитарлық ғылымдар және өнер институты, «Хореография» мамандығының 2 курс студенті;
ІІІ орын – Қалмақан Сырғалым Ерланқызы, Жаратылыстану институтының «Биология» мамандығының 1 курс студенті.
Қалған қатысушылар «Өнерлі ару», «Инабатты ару», «Зерделі ару», «Сымбатты ару», «Кербез ару», «Көрермен көзайымы», «Бұрымды ару» номинацияларымен және алғыс хаттармен марапатталды.
МЕДИА
Коммуникация және маркетинг департаменті
Байланыс телефоны: +7 727 237 00 05
e-mail: qyzdar_universitety@qyzpu.edu.kz
